Mehdiabadda «kupça» paylanıb

Əmlak Məsələləri Dövlət Komitəsi (ƏMDK) əmlakın qeydiyyatı ilə bağlı sadələşdirilmiş tədbir olan «Kütləvi çıxarış» kampaniyasını Abşeron rayonunda davam etdirib. Qeyd edək ki, bu tədbir çərçivəsində vətəndaşlardan daşınmaz əmlakla bağlı ilkin sənədlər toplanaraq həmin əmlakın qeydiyyatı barədə çıxarışla əvəz olunur.

Komitədən verilən məlumata görə, növbəti belə tədbir fevralın 20-də rayonun Mehdiabad qəsəbəsində keçirilib. Kampaniya çərçivəsində 100-ə yaxın vətəndaşa qeydiyyat xidmətləri göstərilib. Belə ki, vətəndaşlardan “Daşınmaz Əmlakın Dövlət Reyestri haqqında” Qanuna əsasən mülkiyyət hüquqlarını təsdiq edən ilkin sənədlər qəbul edilərək onlara çıxarışlar verilib. Belə sənədlərə mənzillərə dair orderlər, aktlar, mülkiyyət barədə qeydiyyat vəsiqələri, torpaq sahəsinə dair sovet dövründə sovxoz və kolxozlar tərəfindən verilmiş əmrlər və Qanunda əksini tapmış digər hüquqi sənədlər aiddir. Eyni zamanda, bir sıra vətəndaşdan mülkiyyətə dair ilkin hüquqi sənədlər çıxarışla əvəz olunması məqsədilə qəbul edilib.

Əmlakın qeydiyyatının üstünlüyü nədədir?

Kampaniya zamanı əmlakın qeydiyyatı ilə yanaşı, vətəndaşlara əmlakın qeydiyyatının vacibliyi, gətirdiyi üstünlüklər və faydalar izah olunub. Bildirilib ki, qeydiyyatsız olan və ya yalnız ilkin sənədləri olan əmlaklardan fərqli olaraq çıxarışı olan əmlaklardan daha səmərəli istifadə etmək və müxtəlif hüquqi əməliyyatlar aparmaq mümkündür. Belə ki, qeydiyyatlı əmlakı alıb-satmaq, girov qoymaq, onu biznes əməliyyatlarında istifadə etmək və digər hüquqi əməliyyatlar həyata keçirmək olar.

Əmlakın qeydiyyatı üçün ən sadə üsul

Qeyd edək ki, əmlakın qeydiyyatı prosesini qat-qat sadələşdirməsinə görə, «Kütləvi çıxarış» kampaniyası vətəndaşların əmlakının leqallaşdırılmasında mühüm rol oynayır. Məhz kampaniya çərçivəsində yaradılan rahat və əlverişli şəraitə görə, əmlakını dövlət qeydiyyatına almaq istəyən vətəndaşların sayı getdikcə artmaqdadır. Ölkənin bütün şəhər və rayonlarında keçirilən “Kütləvi çıxarış” kampaniyası çərçivəsində indiyədək 6700-ə yaxın vətəndaşa dövlət reyestrindən çıxarışlar təqdim olunub.

«Bir pəncərə» prinsipi də var

Qeyd edək ki, ötən ildən etibarən Əmlak Məsələləri Dövlət Komitəsi tərəfindən həm əmlakın qeydiyyatında, həm də torpaq idarəçiliyində «bir pəncərə» prinsipi də tətbiq edilir. Bu yeniliyə görə, həm vətəndaşların, həm də bələdiyyələrin əmlakın qeydiyyatı üçün müxtəlif qurumlara getməsinə ehtiyac yoxdur. Belə ki, bundan ötrü yeganə ünvana - Daşınmaz Əmlakın Dövlət Reyestri Xidmətinə (DƏDRX) müraciət etmək kifayətdir. Müraciətdən sonra əmlakın qeydiyyatı üçün tələb olunan bütün işlər - müxtəlif sənədlərin toplanması və rəsmiləşdirilməsi DƏDRX-in əməkdaşları tərəfindən aparılır. Bu da vətəndaşları həm vaxt itkisindən, həm də çoxsaylı sənədlər toplanması öhdəliyindən azad edir.

 Mənbə: Fins