“Kütləvi çıxarış” kampaniyası - Xaçmazda

“Kütləvi çıxarış” kampaniyası növbəti dəfə bu gün Xaçmaz rayonunda baş tutub.

Kampaniya zamanı 250-yə yaxın vətəndaşa qeydiyyat xidmətləri göstərilib. 150-dək sakinə onların fərdi həyət evi və torpaq sahələrinə, o cümlədən pay torpaqları, vaxtilə kolxoz və sovxozlar tərəfindən verilmiş torpaqlara dair dövlət reyestrindən çıxarışlar və texniki pasportlar təqdim olunub.

“Kütləvi çıxarış” kampaniyası zamanı paylanan çıxarışlar “Daşınmaz əmlakın dövlət reyestri haqqında” Qanuna uyğun olaraq ilkin hüquqi sənədlər əsasında verilib. Bu sənədlərə əmlaka dair orderlər, aktlar, mülkiyyət barədə qeydiyyat vəsiqələri, torpaq sahəsinə dair sovet dövründə sovxoz və kolxozlar tərəfindən verilmiş əmrlər və Qanunda əksini tapmış digər hüquqi sənədlər daxildir.

Qeyd edək ki, bu gündən etibarən Komitə vətəndaşlara pulsuz hüquqi məsləhətlər göstərməyə başlayır. Xidmət çərçivəsində istənilən şəxs komitənin ərazi qeydiyyat idarələrinə müraciət edərək öz əmlakı, onunla aparmaq istədiyi əməliyyat, əmlakın qeydiyyatı və sair xidmətlərlə bağlı suallar verə bilər.

Mənbə: Qafqazinfo.az